Трамп Нобел тинчлик мукофотига номзод бўлди
АҚШ президенти Эрон-Исроил қуролли можароси тўхтатилишида “фавқулодда ва тарихий роль” ўйнагани эътироф этилмоқда.
АҚШ президенти Дональд Трамп 2025 йил 24 июнь куни Эрон ва Исроил ўртасидаги қуролли можаронинг якунланишига эришгани учун расман Нобел тинчлик мукофотига номзод этиб кўрсатилди.
Номзодликни АҚШ Вакиллар палатаси аъзоси, республикачи Бадди Картер илгари сурди. Унинг сўзларига кўра, Трамп минтақада урушнинг тўхтатилишида "фавқулодда ва тарихий роль" ўйнаган ҳамда минглаб, эҳтимол миллионлаб инсонларнинг ҳаётини сақлаб қолган.
Картер Трампнинг Эроннинг ядровий қуролга эга бўлишига тўсқинлик қилган “жасоратли ва қатъий чораларини” алоҳида таъкидлаб, бу ҳаракатлар Нобел мукофотининг асосий мақсадларига — тинчликни тарғиб қилиш, урушларнинг олдини олиш ва халқаро ҳамжиҳатликни мустаҳкамлашга мос келишини қайд этди.
Трамп бунга жавобан, Россия президенти Владимир Путин билан Эрон бўйича қисқа суҳбат ўтказганини, аммо у билан асосан Украина масаласида тинчлик битими тузишга умид қилаётганини маълум қилди. Трамп шунингдек, НАТО саммити доирасида Украина раҳбари Владимир Зеленский билан учрашишни режалаштираётганини билдирди.
