Эронда Исроил фойдасига жосусликда айбланганлар қатл этилди
Сўнгги ойларда Исроил билан алоқада бўлишда гумон қилиниб, 700 дан ортиқ шахс ҳибсга олинган.
2025 йил 25 июнь куни тонгда Эрон ҳукумати Исроил разведка хизмати — «Моссад» фойдасига жосуслик қилганликда айбланган 3 нафар фуқарони осиб ўлдирди. Reuters’нинг ёзишича, бу шахслар ноқонуний ускуналарни мамлакатга олиб киришда ва улардан юқори мартабали шахсларга қарши суиқасдларда фойдаланишда гумон қилинган.
Эрон ҳукумати баёнотига кўра, қатл этилган шахслар "Моссад" томонидан ёлланган ва Эрон ҳудудида террорчилик ҳаракатларини амалга оширишда фаол иштирок этган. BBC маълумотларига кўра, ўхшаш айбловлар билан бир неча кун аввал яна 2 киши қатл этилган. Сўнгги ойларда Исроил билан алоқада бўлишда гумон қилиниб, 700 дан ортиқ шахс ҳибсга олинган.
Бу ҳодиса Эрон-Исроил ўртасидаги зиддият кучайган бир паллага тўғри келди. Исроил 13 июнь куни Эроннинг ядровий иншоотларига ҳужум қилганини, Эрон эса 22 июнь куни ўч олиш мақсадида жавоб зарбаси берганини билдирган. 24 июнь куни томонлар ўт очишни тўхтатишга келишиб олган.
