Россия ва Украина ўртасида навбатдаги маҳбуслар алмашинуви бўлиб ўтди
Томонлар “1000 кишига 1000” формуласи асосида маҳбусларни қайтарди.
Россия ва Украина ўртасида маҳбуслар алмашинуви бўйича навбатдаги босқич муваффақиятли амалга оширилди. Бу ҳақда ТАСС агентлиги Россия музокаралар гуруҳига яқин манбага таянилиб хабар берди, деб ёзади Oxu.Az.
Манбага кўра, мазкур алмашув Истанбулда ўтказилган музокаралар доирасида амалга оширилган бўлиб, томонлар маҳбусларни тенг миқдорда қайтаришга келишиб олган. “Маҳбуслар алмашинуви тенг бўлди. Келишувлар давом этмоқда”, — дейилади баёнотда.
Россия Мудофаа вазирлиги ушбу маълумотни расман тасдиқлади.
Маълумотларга кўра, Истанбулдаги музокараларнинг икки босқичидан сўнг Туркия воситачилигида томонлар “1000 кишига 1000” формуласи асосида ҳар икки давлатдан камида минг нафардан маҳбусни алмашишга келишиб олишган. Шунингдек, оғир касаллар ва 25 ёшгача бўлган шахслар учун “ҳаммаси ҳамма учун” принципи асосида алоҳида алмашув тартиби ҳам назарда тутилган.
Аввалроқ, Россия Президентининг матбуот котиби Дмитрий Песков пайшанба куни берган изоҳида, Истанбул келишувларидаги ҳозирги босқич якунлангач, учинчи раунд бўйича қарорлар қабул қилиниши мумкинлигини билдирган эди.
Мазкур алмашув уруш ҳолатидаги инсоний муаммоларни юмшатиш ва дипломатик музокараларни давом эттириш борасида навбатдаги муҳим қадам сифатида баҳоланмоқда.
