НАТО давлатлари мудофаа харажатларини 5 фоизга оширади
Қарор Трампнинг босими билан қабул қилинди.
2025 йил 25 июнь куни Нидерландияда бўлиб ўтган НАТО саммитида альянсга аъзо давлатлар 2035 йилгача мудофаа харажатларини ялпи ички маҳсулотнинг (ЯИМ) 5 фоизигача оширишга келишиб олди. Бу қарор кўп йиллардан бери АҚШ президенти Доналд Трамп томонидан билдирилган босим ортидан қабул қилинди. Бу ҳақда Forbes хабар берди.
Саммитда Россия Европа хавфсизлигига узоқ муддатли таҳдид сифатида тилга олинди. НАТО аъзолари эса ҳарбий тайёргарликни кучайтириш ва коллектив мудофаани мустаҳкамлаш зарурлигини таъкидладилар.
Бироқ, бу қарор ҳамма давлатлар томонидан бирдек қабул қилинмаган. Масалан, Испания дарҳол баёнот бериб, барча аъзолар бу режага қўшилишга мажбур эмаслигини маълум қилди.
“Мен йиллар давомида улардан бу миқдорни оширишни сўраб келганман. Энди кўпчилиги рози бўлди,” деди Трамп журналистларга. “Олдин 2 фоиз дейилган эди, лекин ҳатто шуни ҳам кўпчилик бажармаган.”
НАТО расмий баёнотида аъзолар ҳозирги мураккаб ва хавфли вазиятда бир ёқадан бош чиқариб, мудофаа имкониятларини мустаҳкамлашга ва ҳарбий тайёргарликни оширишга тайёр экани билдирилди. Бу қарор нафақат хавфсизликни мустаҳкамлаши, балки янги иш ўринларини яратиши ҳам мумкинлиги айтилди.
