“Ўғирлаган пулларингни ўн баробар қилиб қайтарасанлар”
Қирғизистон президенти давлат хизматида ишлаётганларга қатъий мурожаат билан чиқди.
Қирғизистон Президенти Садир Жапаров мамлакатдаги коррупция ҳолатлари юзасидан давлат хизматида ишлаётганларга қатъий мурожаат билан чиқди. Бу ҳақда у ўзининг ижтимоий тармоқлардаги саҳифасида эълон қилган баёнотида маълум қилди.
Президентнинг сўзларига кўра, 2025 йилнинг сентябрь ойидан бошлаб давлат бюджети ҳисобидан молиялаштирилган лойиҳалар – жумладан қурилиш ишлари ва асфальт йўлларни ўз ичига олган текширувлар бошланади. Бу ишларни амалга ошириш учун мутахассислар иштирокида республика миқёсида комиссиялар тузилади.
“Ким давлат маблағини ўзлаштирган бўлса, ўғирланган сумманинг ўн бараварини қайтаради ва жазога тортилади. Бу жараённи бевосита ўзим назорат қиламан. Лавозими, кимлиги, мансабдорлиги муҳим эмас – қонун барчага баробар”, — деди Жапаров.
Шунингдек, Президент ҳалол меҳнат эвазига олинадиган расмий маошдан норозиларни давлат хизматидан кетиб, хусусий тадбиркорлик билан шуғулланишга даъват этди.
“Олдинги даврлар тугади. Энди ким нимани қилаётганини аниқлаймиз. Давлат сизга ишониб топширган маблағлар талон-торож қилинишига йўл қўймаймиз”, — дея қўшимча қилди у.
