Дания фуқароларнинг ташқи кўриниши ва овозини муаллифлик ҳуқуқи сифатида тан олишга киришмоқда

 

Дания сунъий интеллект ёрдамида яратилган сохта материаллар — яъни чуқур сохталаштириш (deepfake) таҳдидларига қарши илғор ҳуқуқий механизм жорий қилишга қарор қилди. Мамлакат ҳукумати дунёда биринчи бўлиб ҳар бир фуқаронинг юз қиёфаси, овози ва хатти-ҳаракатларини шахсий интеллектуал мулк сифатида тан олишни таклиф қилмоқда.

 

The Guardian нашрига таяниб oxu.azning ёзишича, агар инсоннинг рақамли нусхаси — яъни юз тузилиши, овоз тембри ёки хатти-ҳаракатлари — сунъий нейрон тармоқлар ёрдамида қайта тикланиб, уларнинг розилигисиз интернетда тарқатилган бўлса, ушбу материал эгаси уни дарҳол олиб ташлаши шарт бўлади. Бундай ҳолатда жабрланувчига компенсация тўланиши ҳам назарда тутилган.

 

Таъкидлаш жоиз, янги қонун ҳазил ва пародия шаклидаги контентларга татбиқ этилмайди. Қонун лойиҳаси Дания парламенти томонидан деярли бир овоздан маъқулланди ва уни 2025 йил кузида расмий тартибда тақдим этиш режалаштирилган.

 

Дания ҳукумати интернет платформаларини бу борада огоҳлантирган: янги тартиб-қоидаларни эътиборсиз қолдириш жиддий жавобгарликка олиб келади. Қоидабузарликларга катта миқдорда жарималар белгиланиши мумкин. Агар бундай ҳолатлар давом этса, масала Европа комиссияси даражасига олиб чиқилади.

 

Копенгаген ушбу ташаббус Европанинг бошқа давлатлари учун ҳам ҳуқуқий намуна бўлишига умид билдирмоқда.