Microsoft 40 йил ичида биринчи марта Windows экранини ўзгартиради
1985 йилдан бери мавжуд бўлган кўк экран компьютер тизими жиддий хатога учраганида фойдаланувчига хабар берувчи сигнал эди.
Microsoft 40 йилдан бери Windows тизимида ишлатилган машҳур “Кўк ўлим экрани”ни (BSOD) янгилаб, энди уни “Қора ўлим экрани” билан алмаштиришини эълон қилди. Янги ўзгариш Виндовс 11'нинг 24Ҳ2 версиясидан бошлаб жорий этилади. Бу ҳақда MSN хабар берди.
1985 йилдан бери мавжуд бўлган кўк экран компьютер тизими жиддий хатога учраганида фойдаланувчига хабар берувчи сигнал эди. Унинг сўнгги йилларда машҳур бўлган версиясида ғамгин эмотикон :( ҳам пайдо бўлган эди.
Янги қора экран аввалгидек хато коди ва носоз драйвер ҳақидаги маълумотларни кўрсатади, аммо бу сафар тизимни тиклаш тезлиги сезиларли даражада ошади. Microsoft бу ўзгаришни “Windows Resiliency Initiative” доирасида амалга оширмоқда.
Бу ташаббус 2024 йилда юз берган CrowdStrike’нинг глобал носозлигидан сўнг ишга туширилган бўлиб, тизим ишончлилигини ошириш ва фойдаланувчилар учун муаммоларни тезроқ бартараф этишни мақсад қилган.
