Қозоғистонда аёл фарзандини автобус бекатида дунёга келтирди
Она бўлган аёл ва чақалоққа зудлик билан ёрдам кўрсатилди.
Қозоғистоннинг Қарағанда шаҳрида аёл автобус бекатида кутилмаганда фарзанд кўрди. Бу ҳақда Karaganda.kz ахборот портали хабар бермоқда.
Ҳодиса шаҳарнинг жануби-шарқий туманидаги “TBS” автобус бекатида содир бўлган. Маҳаллий фуқаролар томонидан чақирилган тез тиббий ёрдам ходимлари она ва чақалоқни вилояти клиник шифохонасининг перинатал марказига етказган.
Расмий маълумотларга кўра, туғуруқ ҳомиладорликнинг 34-ҳафтасида, бекат ҳудудида, аёл автобус кутётган пайтда содир бўлган. Тиббиёт ходимларининг фикрича, туғуруқ жуда тез кечгани сабабли аёл туғруқхонага етиб боришга улгурмаган.
Айни пайтда она ҳолати барқарор деб баҳоланмоқда. Муддатидан олдин туғилган чақалоқ эса реанимация бўлимида, ҳолати оғир деб хабар берилмоқда.
