Қозоғистонда президент топшириғи асосида журналистларга янги уйлар берилди
Қозоғистонда бу анъана 3 йилдан бери давом этиб келмоқда.
2025 йил 28 июн куни Остона шаҳрида Қозоғистонда Оммавий ахборот воситалари (ОАВ) ходимлари куни муносабати билан тантанали тадбир бўлиб ўтди. Унда Президент Қасим-Жомарт Тўқаев ташаббуси билан ташкил этилган “Дара” фонди томонидан журналистлар ва бошқа медиа соҳаси вакилларига 66 та янги уй топширилди.
“Дара” фондининг маълум қилишича, уй-жой билан таъминлаш ташаббуси мамлакатда ижтимоий барқарорликни мустаҳкамлаш ва фуқароларнинг фаровонлигини оширишга қаратилган давлат сиёсатининг муҳим қисми саналади.
Сўнгги уч йил ичида:
2023 йилда — 65 нафар ОАВ ходимига бепул мулк топширилган;
2024 йилда — 68 та;
2025 йилда эса — 66 нафар журналист ва медиа мутахассиси янги уйларга эга бўлди.
Тадбирда Президент матбуот котиби, маслаҳатчи Руслан Желдибай ҳам сўзга чиқиб, байрам билан табриклаб шундай деди: “Президент Тўқаев топшириғи асосида учинчи йилдирки, бу анъана давом этмоқда. Бу давлат раҳбарининг маҳаллий ОАВга бўлган доимий эътибори ва эътирофидир. Бу йилги уйлар нафақат журналистларга, балки режиссёрлар, операторлар, корректорларга ҳам топширилди. Шунингдек, кўп фарзандли ва ногирон фарзанд тарбиялаётган оилаларга ҳам алоҳида эътибор қаратилди”.
Уй-жой сертификатлари давлат ва хусусий ОАВ вакилларига топширилган бўлиб, улар орасида муҳаррирлар, камераманлар, сценарий муаллифлари, техник мутахассислар ҳамда тажрибали журналистлар мавжуд.
