Трамп Канада билан савдо музокараларини тўхтатмоқчи
Бир ҳафта ичида Канадага нисбатан бож жорий қилинади.
АҚШ Канада билан савдо музокаларини тўхтатиб, мамлакатга нисбатан бож ставкаларини жорий қилади. Бу ҳақида президент Дональд Трамп ўзининг Truth Social ижтимоий тармоғида.
Унинг айтишича, Қўшма Штатлар Канада билан савдо музокараларини давом эттиришдан бош тортмоқда, бунга Оттаванинг Америка технологик компаниялари учун солиқ жорий қилгани сабаб бўлди.
“Канаданинг бу солиғи “Вашингтонга ҳужум” деб ҳисоблаймиз. Биз Канада билан барча савдо музокараларини тўхтатамиз, бу қарор дарҳол кучга киради”, — деб ёзди Трамп.
Кейинги етти кун ичида Канадага АҚШ билан бизнес юритиш учун тўлашига тўғри келадиган бож ставкалари эълон қилиниши кутилмоқда.
Канаданинг технологик компаниялар учун янги солиқ тўғрисидаги қонуни 30 июндан кучга киради. Унга кўра, Аmazon, Google, Uber, Airbnb ва бошқа компаниялар Канададаги фойдаланувчиларга кўрсатилган рақамли хизматлардан олинган даромадларининг 3 фоизини солиқ сифатида тўлашлари керак бўлади.
