АҚШда сиёсий сулола даври бошланадими?

 

АҚШ президенти Доналд Трампнинг ўғли — Эрик Трамп келажакда ўзи ёки оиланинг бошқа аъзоси президентликка номзодини қўйиши мумкинлигини истисно этмади. Бу ҳақда у Financial Times нашрига берган интервьюсида сўз очди деб ёзади oxu.az нашри.

 

“Мен бугунги сиёсатчиларнинг ярмидан ҳайратга тушмайман. Ишончим комилки, ўзим анча яхши иш қила оламан”, — дейди 41 ёшли Эрик Трамп. Бироқ у шу билан бирга, сиёсий лавозим эгаллаш истаги бор-йўқлиги ҳақида қатъий фикрга келмаганини ҳам тан олди.

 

"Фарзандларим сўнгги 10 йил ичида биз бошдан кечирган тажрибани бошларидан кечиришсин, деб истармидим? Бу осон савол эмас. Ҳа деб жавоб берган тақдиримда ҳам, сиёсат йўлига кириш фақат менга эмас, бошқа оила аъзоларига ҳам тегишли бўлиши мумкин”, — деди у.

 

Ҳозирда Эрик Трамп Трамп Организатион компаниясининг вице-президенти ҳисобланади. У отаси Доналд Трамп бизнесни амалда бошқармаётганини, барча эътиборини “учинчи жаҳон урушининг олдини олиш”га қаратганини айтиб ўтди. “Агар отам президентликка номзодини қўймаганида, эҳтимол, оиламиз бойлиги бугун ундан ҳам катта бўларди”, — деди у.

 

Маълумот учун, Доналд Трампнинг жами беш фарзанди бор: Доналд Жр., Иванка, Эрик, Тиффани ва Баррон. Шунингдек, у ҳозирда 11 нафар набиранинг бобоси ҳисобланади.

 

Доналд Трамп ўзи ҳам учинчи бор президентлик учун курашиши мумкинлигини бир неча марта тилга олган. Бироқ АҚШ Конституциясига кўра, бир киши икки муддатдан ортиқ президент бўлиши мумкин эмас.