Германия ва Исроил киберхавфсизликда стратегик иттифоқ тузмоқда
“Кибер гумбаз” — Германия ва Исроилдан янги хавфсизлик ташаббуси.
Германия хавфсизлик соҳасидаги ҳамкорликни кучайтириш мақсадида Исроил билан янги “Кибер гумбаз” тизимини яратишни режалаштирмоқда. Бу ҳақда Bild нашри хабар берди.
Германия ички ишлар вазири Александр Добриндт Эрон-Исроил ўртасидаги 12 кунлик кескин қарама-қаршиликдан сўнг Тель-Авивга ташриф буюрган илк юқори мартабали Германия сиёсатчиси бўлди. Германия ИИВ бу ташрифни Исроилга бирдамлик ифодаси ва янги стратегик алоқаларни йўлга қўйиш йўлидаги муҳим қадам деб атади.
Добриндт ташрифи давомида икки давлат ўртасида кибермудофаа ва дронларга қарши технологиялар соҳаларида ҳамкорликни кенгайтириш бўйича режаларни эълон қилди. Унга кўра:
Германия–Исроил кибер тадқиқот маркази ташкил этилади;
Киберхавфсизлик бўйича тажриба алмашинуви йўлга қўйилади;
Дронларга қарши замонавий мудофаа тизимлари ишлаб чиқилади;
“Кибер гумбаз” деб аталувчи рақамли ҳимоя тизими яратилади.
Бу ташаббус хавфсизлик таҳдидлари ортиб бораётган бир пайтда икки давлат ўртасидаги технологик ва стратегик шерикликни мустаҳкамлашга хизмат қилиши кутилмоқда.
