Италияда жазирама сабабли “қизил” огоҳлантириш эълон қилинди
Экстремал иссиқлик тўлқини 21 та шаҳарга хавф туғдирмоқда.
Италиянинг кўплаб шаҳарларида ҳафта охирида кутилаётган экстремал иссиқлик сабабли соғлиқ учун энг юқори хавф даражасини англатувчи «қизил» огоҳлантириш эълон қилинди. Бу ҳақда "Анадолу" агентлиги хабар берди.
Соғлиқни сақлаш вазирлиги аҳолига жазирамадан эҳтиёт бўлишни тавсия қилмоқда. Анкона, Милан, Рим, Флоренция, Неапол каби йирик шаҳарларда 28 июнь куни огоҳлантириш берилган бўлса, 29 июнь куни Катания, Риети ва яна бир нечта шаҳарда хавф кучайиши кутилмоқда. Жами 21 та шаҳар огоҳлантириш остида.
Мутахассислар фикрича, бу даражадаги иссиқ фақат болалар ва кекса одамларга эмас, балки соғлом инсонларга ҳам хавф туғдиради. Ваҳоланки, ҳарорат нормадан анча юқори бўлиши кутилмоқда.
АҚШда ҳам жазирама оқибатида ўнлаб инсонлар жабрланган. 23 июнь куни очиқ ҳаводаги тадбирдан сўнг 150 дан ортиқ одамнинг аҳволи оғирлашган. Иссиқлик тўлқини Канада ҳудудларига ҳам таъсир кўрсатган.
