Болливуд юлдузининг кутилмаган ўлими
Машҳур актриса ёшартирувчи муолажадан сўнг вафот этди.
Таниқли модель ва актриса Шефали Жаривала 42 ёшида вафот этди. Манбаларга кўра, у косметологик муолажадан сўнг ўзини ёмон ҳис қилган ва касалхонада вафот этган.
Жариваланинг яқинлари айтишича, 27-июнь куни у доимий равишда фойдаланиб келган ёшартирувчи уколни қабул қилган. Кечаси эса унинг соғлиги кескин ёмонлашиб, қон босими тушган, титроқ кузатилган. Зудлик билан шифохонага етказилган бўлса-да, шифокорлар унинг ҳаётини сақлаб қола олишмаган.
Полиция ҳозирча ўлимни бахтсиз ҳодиса деб баҳоламоқда. Тергов давом этмоқда, токсикологик таҳлиллар натижалари эса асосий аниқликни киритиши кутилмоқда.
Маълум бўлишича, Шефали неврологик касалликдан азият чеккан ва доимий дори-дармонлар қабул қилган. У вафот этган куни диний маросим ўтказгани ва рўзада бўлгани, бу эса дориларнинг таъсирини оширган бўлиши мумкинлиги айтилмоқда.
Жаривала ўз фаолиятини 2000-йилларда бошлаган, унинг "Каанта Лага" клипи Ҳиндистонда ҳақиқий сенсацияга айланганди. Кейинчалик у Bigg Boss 13 шоусида ҳам иштирок этиб, мухлислар меҳрини қозонган эди.
