Эрон Покистонга миннатдорчилик билдирди
АҚШ ва Исроилнинг ҳужуми давомида Покистон томони Эронни очиқ қўллаб-қувватлаган.
Эрон Қуролли Кучлари бошлиғи генерал-майор Абдулраҳим Мусавий ва Покистон армияси раҳбари Осим Мунир телефон орқали мулоқот ўтказди. Суҳбат давомида Эрон генерали Покистонга миннатдорчилик изҳор этди.
Мусавийнинг таъкидлашича, АҚШ ва Исроилнинг ҳарбий тажовузи давомида Покистон томони Эронни очиқ қўллаб-қувватлаган. Бу ҳаракат Эрон томонидан юксак қадрлангани таъкидланди.
Икки томон ҳам минтақавий барқарорлик ва хавфсизликни таъминлашда ўзаро ҳамкорликни давом эттиришга келишиб олди. Суҳбат дўстона ва конструктив муҳитда кечгани қайд этилди.
Эслатиб ўтамиз, Эрон ва Покистон ўртасида ҳарбий соҳадаги алоқалар сўнгги йилларда сезиларли даражада фаоллашган. Бу мулоқот ҳамкорликни янада мустаҳкамлашга хизмат қилиши кутилмоқда.
