Россияда муҳожирлар ва ҳайдовчилар учун давлат божлари оширилиши мумкин
Янги қонун лойиҳаси давлат бюджети ҳисобига 45 миллиард рубль даромад олиб келиши кутилмоқда.
Россияда 2025 йил 1 сентябрдан бошлаб муҳожирлар ва автомобиль эгалари учун бир қатор давлат божлари сезиларли даражада оширилиши мумкин. Бу ҳақда “Известия” нашрига таяниб Oxu.Az хабар берди.
Маълумотларга кўра, 30 июнь куни Россия Федерацияси Молия вазирлиги томонидан ишлаб чиқилган қонун лойиҳаси ҳукумат комиссияси томонидан кўриб чиқилиши режалаштирилган.
Янги тартибга кўра:
- Миграция ҳисобини юритиш учун тўлов 500 рублни ташкил қилади;
- Иш рухсатномасини узайтириш – 4200 рубль;
- Патент олиш ва уни узайтириш – 4200 рубль;
- Ҳужжатлар дубликатини олиш – 2100 рубль бўлади.
Шунингдек, автомобиль эгалари учун ҳам бир қатор ўзгаришлар кутилмоқда:
- Ҳайдовчилик гувоҳномасининг расмийлаштириш нархи икки баравар ошиб, 4000–6000 рублгача етади;
- Транспорт воситасининг техник паспорти (ТСП) дизайни қиймати 1200 рублгача ошади;
- Пластик СТС (автомобиль гувоҳномаси) учун тўлов 1500 рублдан 4500 рублгача кўтарилади.
Молия вазирлиги сўнгги марта давлат божлари 7–11 йил олдин индексация қилинганини эслатиб ўтди. Уларнинг таъкидлашича, мигрантларга бепул кўрсатиладиган хизматлар амалда Россия солиқ тўловчилари ҳисобидан молиялаштирилмоқда.
Лойиҳа қабул қилинса, янгиланган божлар давлат бюджетига қарийб 45,4 миллиард рубль қўшимча даромад келтиради. Шундан 17 миллиард рубль миграция божлари, 28,3 миллиард рубль эса транспорт божлари ҳисобига тушади.
Шунингдек, аввалроқ 2025 йил январидан бошлаб никоҳни бекор қилиш учун давлат божи оширилгани маълум қилинган эди. Бу эса суд муҳокамаларига бўлган талабни кескин ошириб юборган. Эндиликда ҳукумат судларга мурожаат қилиш учун ҳам божларни кўтаришни режалаштирмоқда.
