Россияда янги тенденция: бой оилалар фарзандлари учун хитойлик энагаларни ёлламоқда

 

Россияда бой ва таълимга эътиборли оилалар фарзандларига хитой тилини ўргатиш учун энди тобора кўпроқ хитойлик энагаларни ёлламоқда. Бу ҳақда The New York Times нашри English Nanny агентлиги асосчиси Валентин Гоголга таяниб хабар берди.

 

Унинг айтишича, хитой тилида сўзлашувчи энагаларга талаб ҳозирда инглиз тилидагилардан кейин иккинчи ўринга чиқиб олган, ҳатто француз тилидагилардан ўзиб кетган. Талаб шунчалик юқорики, Энглиш Наннй компанияси бу эҳтиёжни қондириш учун барча ресурсларини сафарбар қилмоқда.

 

Хитойлик энагаларнинг ойлик маоши 5000 долларгача етади. Бундай ёндашув — яъни болаликдан бошлаб хитой тилини ўргатиш — Россиядаги элит қатлам орасида оммалашмоқда. Энглиш Наннй мижозларининг кўпчилиги энди хитой тилини инглиз тилидан кейинги энг муҳим хорижий тил сифатида кўрмоқда.

 

NYT бу тенденцияни Россияда кузатилаётган умумий “хитойлашиш” жараёнининг бир бўлаги сифатида баҳолайди. Мамлакатда хитой тилига, Хитойда таҳсил олишга, маданияти ва маҳсулотларига бўлган қизиқиш сезиларли даражада ортган.

 

Президент Владимир Путин ҳам бу борадаги ўз тажрибасини бўлишган. У набирасининг хитой тилида бемалол суҳбатлаша олишини айтиб, унинг Пекинлик энага ёрдамида тилни мукаммал ўрганаётганини таъкидлаган эди.

 

Ғарб маданияти ва қадриятларига кўр-кўрона эргашиш даври ортда қолмоқда. Эндиликда Хитой маданиятига яқин бўлиш, хитой тилини билиш Россияда янги мода ва мақсадга айланган.