АҚШ Украинага қурол етказиб беришни тўхтатди

АҚШ Украинага мўлжалланган айрим қуроллар етказиб берилишини вақтинча тўхтатди. Оқ уй бу қарорни мамлакат ҳарбий захиралари ҳаддан ташқари камайгани ва “Америка манфаатларини биринчи ўринга қўйиш” зарурати билан изоҳлади.

 

Политисо хабар қилган бу тўхтатиш қарори Россиянинг Украинага қарши кучайиб бораётган ҳужумлари фонида эълон қилинди. Пентагон вакилининг Associated Press’га маълум қилишича, хавфсизлик текширувлари натижасида айрим муҳим қуролларнинг захираси етарлича эмаслиги аниқланган.

 

“Бу қарор мамлакатимиз ҳарбий салоҳиятини сақлаб қолиш мақсадида қабул қилинди,” деди Оқ уй вакили Анна Келли. “АҚШ қуролли кучларининг қудрати шубҳасиз – буни Эронга берган зарбамиз ҳам исботлади.”

 

АҚШ ҳозиргача Украинага $66 миллиарддан ортиқ ҳарбий ёрдам кўрсатган. Бироқ президент Доналд Трамп ва мудофаа вазири Пит Ҳегсетҳ томонидан олиб борилаётган янги сиёсат кўпроқ ички эҳтиёжларга ва НАТОдаги иттифоқчилар зиммасига кўпроқ масъулият юклашга қаратилган.

 

Украина президенти Владимир Зеленский билан яқинда НАТО саммити доирасидаги учрашувда Трамп "Патриот" ҳаво мудофааси тизимларини бериш масаласини очиқ қолдирди. Бироқ Пентагоннинг қурол таъминотини қисқартириш қарори Киев учун оғир йўқотиш бўлиши мумкин — айниқса Россиянинг сўнгги йирик ҳаво ҳужумлари фонида.