Буюк Британия жиноятчиларни кузатишда тана ости технологиясини жорий этмоқчи
Британия инновацион назорат чораларини кўриб чиқмоқда.
Буюк Британияда адлия тизимидаги инқирозни енгиллаштириш мақсадида илгари сурилган инновацион ғоялар қаторида жиноятчиларнинг териси остига кузатув мосламаларини ўрнатиш таклифи алоҳида эътиборни тортди.
“The Guardian” нашрига таяниб oxu.az'ning ёзишича, ушбу ғоялар ўтган ой Лондонда Адлия вазири Шабана Маҳмуд раҳбарлигида бўлиб ўтган йиғилишда муҳокама қилинган. Унда 20 дан ортиқ етакчи технология компаниялари иштирок этди. Вазир Маҳмуд компанияларни қамоқхона тизимига замонавий технологияларни жалб этиш орқали яқин ҳамкорликка чорлади.
Қамоқхоналардаги жой танқислиги, пробация хизматидаги ортиқча юклама шароитида, вазирлар “қамоқхонадан ташқарида қамоқхона” контсепциясини илгари сурмоқда. Унга кўра, жиноятчиларни назорат қилиш учун уларнинг хатти-ҳаракатлари ва жойлашувини аниқловчи тақиладиган ёки ҳатто тана остига ўрнатиладиган кузатув мосламаларидан фойдаланиш режалаштирилмоқда.
Технологик таклифлар қаторида робот назоратчилар ва маҳбусларни ташиш учун учувчисиз транспорт воситаларини жорий этиш ҳам мавжуд.
Мазкур йиғилишда Google, Amazon, Microsoft ва АҚШ мудофаа тизими билан ҳамкорлик қилувчи Palantir каби глобал технология гигантлари вакиллари қатнашгани эътиборга молик.
