Дания 18 ёшли қизларни ҳарбий хизматга чақиради
Россия таҳдиди фонида Дания армиясида аёлларга тенг иштирок этиш имконияти яратилмоқда.
Россиянинг Украинадаги босқини фонида хавфсизлик чоралари кучайтирилаётган бир пайтда Дания илк бор аёлларни ҳам мажбурий ҳарбий хизматга жалб қилмоқда. Бу ҳақда мамлакат парламенти июнь ойида қабул қилган янги қонунга мувофиқ, 18 ёшга тўлган аёллар эркаклар билан бир қаторда ҳарбий хизматга жалб этилиши мумкин бўлади.
Пойтахт Копенгагендан шимолда жойлашган Ҳовелтедаги ҳарбий машғулотлар майдонида 20 ёшли Катрине юзига камуфляж бўёқларини суртган ҳолда, ҳушёрлик билан ўрмонзорни кузатмоқда. У ва бошқа аёл кўнгиллилар, шу йил бошида хизматга ёзилган. Авваллари аёллар фақат кўнгилли асосида хизмат қилиши мумкин эди, аммо эндиликда улар мажбурий чақирувда ҳам иштирок этади.
“Бугунги хавфли вазиятда бу керак. Менимча, аёллар эркаклар билан тенг қатнашиши адолатли ва тўғри қарор,” дейди Катрине. Янги тартибга кўра, барча 18 ёшга тўлган аёллар лотерея асосида чақирувга тушади. Хизмат муддати эса 4 ойдан 11 ойгача узайтирилади.
Йиллик ҳарбий хизматга чақирилувчилар сонини 2033 йилга бориб 6 500 нафарга етказиш режалаштирилган. Мутахассислар ҳарбий қурилиш ва ускуналар етишмаслиги каби муаммолар борлигини таъкидласада, Дания ҳукумати бу қарор билан миллий мудофаани мустаҳкамлашни мақсад қилган.
