Францияда очиқ жойларда тамаки чекиш тақиқланди: қоидабузарлар жаримага тортилади

 

2025 йил 1 июлдан бошлаб Францияда болалар бўлиши мумкин бўлган барча очиқ жойларда тамаки маҳсулотларини истеъмол қилиш тақиқланди. Эндиликда боғлар, пляжлар, автобус бекатлари, мактаблар кириш ҳудудлари ва спорт иншоотларида чекиш қатъиян ман этилди. Бу чора Франция президенти Эммануэл Макроннинг “2032 йилгача тамакидан ҳоли авлод”ни яратиш ташаббуси доирасида амалга оширилмоқда.

 

Янги қоидаларга кўра, жамоат жойларида чекиш билан боғлиқ қоидаларни бузганлар, шу жумладан чет эллик сайёҳлар ҳам, 90 евро миқдорида жаримага тортилади. Агар жарима 15 кун ичида тўланмаса, унинг миқдори 135 еврога оширилади.

 

Франция бу борада Европада илғор давлатга айланди — пляжда тамаки истеъмолини тақиқлаган илк давлат сифатида тарихга кирди. Аввалроқ Испания ва Италия айрим ҳудудларда чекишга чекловлар жорий қилган эди.

 

Францияда тамаки истеъмоли 1990 йиллардан буён пасайиб бормоқда. 2024 йилги соғлиқни сақлаш агентлиги ҳисоботига кўра, ҳозирда катта ёшлилар орасида чекувчилар улуши 23 фоизни ташкил этади. 17 ёшли ўсмирлар орасида эса бу кўрсаткич 2022 йилга келиб 16 фоизга тушган. 2017 йилда бу рақам 25 фоиз эди.

 

Шунга қарамай, Франция ҳали ҳам Европанинг энг кўп тамаки истеъмол қилувчи давлатларидан бири бўлиб қолмоқда. Бу ҳолат, асосан, Болгария, Туркия ва Жазоирдан мамлакатга ноқонуний йўллар билан кириб келаётган контрабанда сигаретлар оқими билан боғлиқ. Тадқиқотларга кўра, 2024 йилнинг ўзида Францияда 18,7 миллиардта ноқонуний сигарет истеъмол қилинган бўлиб, бу умумий истеъмолнинг қарийб 38 фоизини ташкил этади.