АҚШ Хитойга чип технологияси экспортидаги чекловларни бекор қилди
Synopsys, Cadence ва Siemens’га Хитой бозорига кириш учун рухсат берилди.
АҚШ Хитойга чип ишлаб чиқиш учун зарур бўлган дастурлар экспортига қўйилган чекловларни бекор қилди. Бу ҳақда Блоомберг нашрига таяниб kommersant.ru хабар берди.
Хусусан, Доналд Трамп маъмурияти даврида Хитойга EDA (Electronic Design Automation) дастурларини — яъни чип лойиҳалаш тизимларини экспорт қилиш учун жорий этилган лицензия талабларига энди эҳтиёж қолмайди.
АҚШ Савдо вазирлиги бу ўзгариш ҳақида Synopsys, Cadence ҳамда Siemens каби етакчи технологик компанияларга расмий равишда маълум қилган. Siemens аллақачон Хитойдаги фаолиятини қайта тиклаган бўлса, қолган компаниялар ҳам экспорт жараёнини йўлга қўйиш босқичида.
Мазкур чоралар АҚШ ва Хитой ўртасида эришилган янги савдо келишуви доирасида амалга оширилмоқда ва технологик чекловларни юмшатишга қаратилган. АҚШ, ўз навбатида, Хитойдан нодир ер элементлари ва бошқа муҳим минераллар экспортини жадаллаштиришни талаб қилмоқда.
Маълумот учун, аввалги экспорт чекловлари айнан Хитой томонидан нодир ер элементларининг етказиб берилиши чеклангани ортидан жорий этилган эди. Эндиликда эса томонлар ўзаро савдони тиклаш ва муҳим технологиялар алмашинувида мувозанатли ёндашувга эришишга интилмоқда.
