Қирғизистон аҳоли даромадлари ўсиши бўйича Марказий Осиёда етакчилик қилмоқда
Россияга параллель импортда Қирғизистон муҳим транзит нуқтага айланган.
Халқаро валюта жамғармасининг сўнгги ҳисоботига кўра, 2022–2024 йиллар давомида Қирғизистонда жон бошига даромад 85 фоизга ошиб, 2500 долларга етди. Бу кўрсаткич Марказий Осиёда энг юқори ўсиш сифатида қайд этилди. Шу даврда Тожикистонда даромад 49 фоизга, Қозоғистонда 42 фоизга, Ўзбекистонда эса 37 фоизга кўтарилган.
Иқтисодий ўсиш суръати 2024 йилнинг биринчи чорагида 13,1 фоизни ташкил қилган. ХВЖ бу йилги умумий ўсишни 6,8 фоиз деб баҳолаб, ўрта муддатда ўсиш 5,25 фоизгача пасайишини тахмин қилмоқда. Иқтисодчи Миркомил Холбоевга кўра, ҳозирги тренд сақланиб қолса, Қирғизистон яқин йилларда жон бошига даромад бўйича Ўзбекистонга етиб олиш эҳтимоли катта.
Иқтисодий таҳлилчи Отабек Бакиров бу муваффақиятни Қирғизистонда ҳокимиятнинг марказлашуви, солиқ ва божхона тизимидаги тартибга солиш ишлари ҳамда Россияга нисбатан санкциялардан усталик билан фойдаланиш билан боғлайди. Унга кўра, Россияга параллель импортда Қирғизистон муҳим транзит нуқтага айланган.
Шунга қарамай, экспертлар бу ўсиш доимий бўлишига эҳтиёткорлик билан қарамоқда. Авторитар бошқарувнинг давом этиши, непотизм ёки коррупцияга йўл очилиши иқтисодий ўсишни секинлаштириши мумкинлиги таъкидланмоқда. Шу билан бирга, Қирғизистон ҳозирча бу вазиятдан энг кўп фойда кўрган минтақа давлатларидан бири бўлиб қолмоқда.
