Шимолий Корея Россияга минглаб аскар юбормоқда

Украина ҳарбий разведкаси ҳисоботида қайд этилишича, Шимолий Корея Россия сафини кучайтириш учун 25–30 минг нафар аскарни Украинадаги фронтга юборишга тайёргарлик кўрмоқда. Бу ҳақда CNN хабар берди. Эслатиб ўтамиз, 2024 йил кузида Шимолий Корея томонидан аллақачон 11 минг аскар юборилган эди. Уларнинг тахминан 4 минг нафари Курск вилоятида ҳалок бўлган ёки жароҳат олган.

 

Украина разведкасига кўра, янги аскарлар тўғридан-тўғри Россия бўлинмаларига қўшилиши ва босиб олинган ҳудудлардаги жанговар операцияларда иштирок этиши мумкин. Спутник тасвирлари асосида "Ропуча" десант кемалари ва Ил-76 юк самолётларининг фаоллиги қайд этилган. Бу воситалар илгари Шимолий Корея ҳарбийларини жўнатишда ишлатилган.

 

Жанубий Корея разведкаси ҳам КХДРда 2025 йилнинг июль–август ойларида хорижга юбориш учун аскар танлаб олинаётганини тасдиқлади. Украина мудофаа вазири Рустем Умеров бу ҳаракатларни Россияда сафарбарлик ресурсларининг тугаётганига ишора сифатида баҳолади. Украина бош штаби раҳбари Александр Сıрский эса Россия Покровск йўналишида 110 минг аскарни тўплаётганини ва бу катта ҳужум тайёргарлиги бўлиши мумкинлигини айтди.

 

Шимолий Корея илгари ҳам Россияга камида 100 та баллистик ракета ва 9 миллион дона артиллерия снарядлари етказиб берган. Украина разведкаси CNNга Шимолий Корея артиллерия уставларининг рус тилига таржима қилинган нусхаларини ҳам тақдим этган. Бу эса икки давлат армиялари ўртасидаги ҳарбий ҳамкорлик тобора чуқурлашаётганидан далолат беради.