Японияни мега-зилзила қоплаши мумкин: ҳукумат огоҳлантирмоқда
Зилзила хавфини инобатга олган Япония ҳукумати фавқулодда вазиятлар режасини янгилади.
Япония ҳукумати ҳалокатли зилзила хавфи ҳақида аҳолига расман мурожаат қилди. Асаҳи газетасининг ёзишича, ҳукумат экспертлари яқин 30 йил ичида мамлакат жануби-ғарбий қирғоғида жойлашган “Нанкаи хандаги”да 8 дан 9 баллгача бўлган кучли зилзила содир бўлиш эҳтимоли 75–82 фоизни ташкил этишини маълум қилган дейди oxu.az нашри.
Ушбу сув ости ёриғи йирик цунами тўлқинларига сабаб бўлиши мумкин. Тахминларга кўра, тўлқинларнинг баландлиги баъзи ҳудудларда 20 метргача етади. Энг кўп зарар Осака, Вакаяма, Кумамото ва Миязаки префектураларига етиши кутилмоқда.
Зилзила хавфини инобатга олган Япония ҳукумати фавқулодда вазиятлар режасини янгилади. Унга кўра, қўшимча тўғонлар, ҳимоя иншоотлари қурилиши ва аҳоли учун эвакуация бошпаналари барпо этилиши режалаштирилган.
Японияда зилзилалар одатий ҳодиса ҳисобланади. Фақатгина июнь ойида мамлакат жанубида 474 та зилзила қайд этилган бўлиб, улардан бирининг магнитудаси 5.1 га етган.
