Буюк Британияда сифатсиз Ботокс сабаб 28 аёл реанимацияга тушди
Ботулинум токсини билан заҳарланиш ҳолатлари бўйича тергов ишлари бошланган.
Буюк Британиянинг Питерли шаҳрида сифатсиз Ботокс инъекциясидан заҳарланган 28 нафар аёл шифохонага ётқизилди. Жабрланган аёлларнинг барчасига косметолог Гемма Грей томонидан бир хил маҳсулот укол қилинган бўлиб, у Британияда фойдаланиш тақиқланган ботулинум токсинини ишлатгани аниқланган деб хабар беради oxu.az нашри.
Жабрланганлардан бири — 36 ёшли Калей Бейли — муолажани одатдагидан икки баравар арзон нархда олганини айтади. Инъекциядан сўнг дарҳол ўзини ёмон ҳис қилганини билдирган Бейли: “Кўзларим жуда сиқилди, доимий ёш оқарди. Бир неча кундан кейин эса кўзларим хиралашиб кўра бошлади”, — дейди.
Биринчи навбатда унга шифокорлар томонидан уй шароитида дам олиш тавсия этилган бўлсада, аҳволи кескин ёмонлашган. Касалхонада ботулизм — кам учрайдиган, аммо ҳаёт учун хавфли бактериал заҳарланиш аниқланган. Бейли нафас олишда қийналган ва уч кун давомида реанимацияда қолган.
Ушбу воқеадан сўнг яна 27 нафар аёлда ҳам ўхшаш заҳарланиш аломатлари аниқланган. Маълум бўлишича, улар ҳам айнан Гемма Грей хизматидан фойдаланган. Айни вақтда косметологга нисбатан расмий тергов ишлари олиб борилмоқда.
