Эрон нефть қазиб олишни тўлиқ тиклади ва рекорд даражага чиқди
Эрон халқаро босим ва ҳарбий таҳдидларга қарамай, нефть қазиб олиш ҳажмини сўнгги ўн йиллик ичидаги энг юқори даражага етказди.
Bloomberg'нинг ёзишича, Исроилнинг 13 июндан бошлаб Эрон нефть ва газ саноатига уюштирган ҳаво ҳужумлари, шунингдек, АҚШнинг узоқ йиллик санкцияларига қарамай, Теҳрон иқтисодий барқарорликни сақлаб қолишга муваффақ бўлмоқда. Таҳлилларга кўра, сўнгги бир ой ичида Эрон нефть қазиб олиш ва экспорт кўрсаткичларини кескин оширган.
2024 йил давомида Эрон кунига ўртача 5 миллион баррель нефть қазиб олди — бу 1979 йилда ҳукумат алмашганидан бери қайд этилган энг юқори кўрсаткичдир. Нефть ва нефть маҳсулотлари экспортидан ўтган йили мамлакат 78 миллиард доллар даромад кўрган бўлиб, бу санкциялар жорий этилмасидан олдинги даражага яқинлашганини англатади.
Vortexa компанияси маълумотига кўра, 2025 йил июнь ойида Эрондан нефть экспорти кунига 1,8 миллион баррелдан ошган, асосий харидор эса — Хитой. Теҳрон Хитой билан стратегик савдо ҳамкорлигидан фаол фойдаланган, шунингдек, мураккаб логистик схемалар орқали санкцияларни айланиб ўтишга муваффақ бўлган.
Эрон нефть инфратузилмасига қаратилган ҳаво ҳужумлари натижасида айрим заводларда ёнғинлар чиққан, Жанубий Парс газ кони ва бир нечта қайта ишлаш заводлари вақтинча ишдан чиққан. Бироқ Эрон Энергетика вазирлиги хабарига кўра, асосий инфратузилма сақланиб қолган ва етказиб бериш қисқа фурсатда тикланган. Жанубий Парс мамлакатдаги газ қазиб олишнинг учдан икки қисмини ташкил этади.
Шу билан бирга, таҳлилчилар огоҳлантиришича Эроннинг асосий нефть экспорт терминали бўлган Харқ ороли Исроилнинг навбатдаги ҳужумлари учун асосий нишонга айланиши мумкин.
АҚШ президенти Доналд Трамп июнь охирида Эрон бўйича баъзи санкциялар юмшатилиши мумкинлигини билдирган бўлсада, кейинроқ бу фикридан воз кечган — бунга Теҳрон расмийларининг кескин баёнотлари сабаб бўлган.
