Гавайиликлар Пентагонга қарши: аждодлар ерини талаб қилмоқда
Гавайидаги маҳаллий аҳоли АҚШ ҳарбийларининг ўз ерларидан чиқиб кетишини талаб қилмоқда.
ABC News телеканали маълумотига таянаб oxu.az'нинг маълум қилишича, Гавайининг туб аҳолиси — абориген жамоалари Пентагоннинг ҳарбий мавжудлигига қарши норозилик билдирмоқда. Улар АҚШ ҳарбийлари жойлашган ҳудудлар — улар учун аждодлардан қолган муқаддас ерлар ҳисобланишини таъкидлашмоқда.
Норозилик айниқса Гавайининг Оаху оролида жойлашган ҳарбий полигон атрофида кучайган. Маҳаллий фаоллар фикрича, бу ҳудудлар нафақат босиб олинган, балки ер ва сув манбалари ҳам ифлосланган.
“Улар нафақат бизнинг ерларимизни эгаллади, балки сувимизни ҳам заҳарлади,” — дейди “Ka Lāhui Hawaiʻi” ташкилоти вакили.
Ҳозирда АҚШ ҳарбийлари Гавайи оролларининг тахминан 5 фоизини назорат қилади. Гарчи расмийлар атроф-муҳитни муҳофаза қилиш бўйича чора-тадбирлар кўрилаётганини айтсалар-да, гавайиликлар тарихий адолатсизликлар, экологик зарар ва мустамлака руҳидаги ёндашувдан норози.
Муҳим жиҳатлардан бири шундаки, ҳарбий базалар жойлашган ерлар ижара асосида фойдаланилмоқда ва асосий шартномалардан бири 2029 йилда муддати тугайди. Маҳаллий аҳоли бу муддатдан сўнг АҚШ ҳарбийларининг ҳудуддан чиқиб кетишини талаб қилмоқда.
Шунингдек, жамоалар АҚШнинг Тинч океанидаги ҳарбий стратегиясига норозилик билдириб, бу сиёсат маҳаллий қадриятлар ва муқаддас маконларни йўқ қилаётганини айтмоқда.
