Россия Толибон ҳукуматини расман тан олди
Москва шаҳридаги Афғонистон элчихонасига Толибон томонидан жорий этилган янги давлат байроғи ўрнатилди.
Россия Ташқи ишлар вазирлиги TASS агентлигига берган маълумотига кўра, Москва Афғонистонда ҳокимият тепасига келган Толибон тузган Ислом Амирлигини расман тан олди. Бу қарор ТИВ раҳбари Сергей Лавровнинг тавсияси асосида Президент Владимир Путин томонидан қабул қилинган.
Россиянинг Афғонистондаги махсус вакили Замир Кабуловнинг сўзларига кўра, бу тан олиш — Москванинг Кобул билан расмий мулоқотни йўлга қўйиш истагини кўрсатади. Кремль ушбу қадами билан Толибон ҳукуматини халқаро миқёсда легаллаштириш томон муҳим қадам ташлади.
Шу билан бирга, бугундан бошлаб Москва шаҳридаги Афғонистон элчихонасида Толибон томонидан жорий этилган янги давлат байроғи ҳилпирамоқда. Бу рамзий ўзгариш Афғонистоннинг Россиядаги дипломатик мақомини ҳам янгиланишига ишора қилади.
Россиянинг ушбу қарори халқаро ҳамжамиятда турлича муносабат уйғотмоқда. Кўплаб давлатлар Толибон ҳукуматини тан олишдан ҳануз тийилаётган бир вақтда, Москванинг бу қадами минтақавий сиёсатдаги муҳим бурилиш сифатида баҳоланмоқда.
