Америкалик шифокор робот орқали беморни масофадан операция қилди
Операция давомида бемордаги ўсимта муваффақиятли олиб ташланган.
Американинг Флорида штатида яшовчи шифокор Випул Пател анголалик 67 ёшли бемор Фернандо да Силвага масофадан туриб робот ёрдамида операция ўтказди. Март ойида унга простата бези саратони ташхиси қўйилган, июн ойида эса ўсимта муваффақиятли олиб ташланди.
Пател – Орландо шаҳридаги Advent Health марказининг Global Robotic Institute тиббий директори ҳисобланади. У ушбу операцияни трансқитъавий роботлаштирилган тизим орқали амалга оширди, деб хабар берди ABC News.
Ушбу технология туфайли шифокорлар минглаб километр масофада жойлашган беморларга ҳам жарроҳлик амалиётларини бажара олишмоқда. Пателнинг айтишича, бу Африкадаги саратон беморлари учун катта имконият яратади.
"Авваллари бу ҳудудларда на етарли мониторинг, на даволаш имкониятлари бўлган," – дейди Пател. Эндиликда эса илғор технологиялар ёрдамида масофавий амалиётлар орқали беморларга умид бағишлаш мумкин бўлмоқда.
