Германия олти ойлик ихтиёрий ҳарбий хизматни жорий қилишни режалаштирмоқда
Германия ҳарбий хизматчилар сонини 260 минг нафаргача оширишни режалаштирмоқда.
Германия ҳукумати миллий мудофаа салоҳиятини кучайтириш ва Россиядан бўлган эҳтимолий таҳдидларга жавобан олти ойлик ихтиёрий ҳарбий хизмат тизимини жорий этишни режалаштирмоқда. Бу ҳақда “Reuters” агентлиги ушбу режа билан таниш манбаларга таяниб хабар берди дейди oxu.az нашри.
Янги ташаббус доирасида кўнгиллилар хавфсизлик, логистик ва бошқа енгил ҳарбий вазифаларга ўргатилади. Шунингдек, улар юк машинаси ёки танк ҳайдовчиси каби мутахассисликлар бўйича ҳам тайёргарликдан ўтишлари мумкин.
Манбаларга кўра, агар кўнгиллиларнинг сони етарли бўлмаса, ҳукумат мажбурий ҳарбий хизматни тиклаш масаласини кўриб чиқиши мумкин. Ҳозирча эса дастур иштирокчилари учун янги казармалар қуриш режалаштирилмоқда, бу эса уларнинг хизмат жойини яшаш манзилларига яқинлаштириш имконини беради.
Германия мудофаа вазири Борис Писториус ҳарбий хизматчилар сонини 180 мингдан 260 минг нафаргача оширишни мақсад қилган. Расмийлар фикрича, олти ойлик дастур орқали бу кўрсаткичларга эришиш тезлашади ва айрим иштирокчилар ҳарбий хизматни давом эттиришга қарор қилиши мумкин.
Эслатиб ўтамиз, Германия 2011 йилда мажбурий ҳарбий хизматни бекор қилган эди.
