ҲАМАС АҚШ тинчлик режасига ижобий жавоб берди
Бироқ режа расман қабул қилингани номаълум.
BBC хабарига кўра, ҲАМАС ҳаракати АҚШ томонидан таклиф этилган сўнгги сулҳ режасига "ижобий жавоб" берганини билдирган. Бу режа Ғазо секторида ўт очишни тўхтатиш ва гаровга олинганларни озод қилишни кўзда тутади.
ҲАМАС баёнотида ҳаракат “янги музокаралар босқичини дарҳол бошлашга жиддий тайёр” эканлигини маълум қилган. Бироқ у АҚШ таклифларини расман қабул қилганини тасдиқламаган.
Аввалроқ АҚШ президенти Доналд Трамп ҲАМАСдан сулҳ бўйича бир кун ичида жавоб кутаётганини айтган эди. Трампга кўра, Исроил урушни якунлаш учун зарур шартларни қабул қилган ва бунинг асосида 60 кунлик ўт очишни тўхтатиш режими эълон қилиниши мумкин.
Режа доирасида:
Гаровдаги 10 нафар тирик исроиллик босқичма-босқич озод қилинади;
18 нафар ҳалок бўлганлар жасадлари топширилади;
Исроил ўз қамоқхоналаридаги айрим фаластинлик маҳбусларни озод этади.
Ҳозирда Ғазо секторида 50 нафар исроиллик гаровда сақланаётгани айтилмоқда, улардан 20 нафари тирик бўлиши тахмин қилинмоқда.
ҲАМАСнинг асосий талабларидан бири — Ғазога озуқ-овқат ва тиббий ёрдамни тўсқинликсиз етказиш имконини беришдир. АҚШ таклифларида бу борада БМТ ва Қизил Хоч ёрдамида етарли гуманитар ёрдам етказилиши назарда тутилган.
Шунингдек, режа Исроил қўшинларининг Ғазо ҳудудининг айрим қисмларидан босқичма-босқич чиқишини кўзда тутади.
Бироқ ҲАМАС учун муҳим шартлардан бири шуки, 60 кунлик сулҳ якунлангач, Исроил ҳарбий амалиётларни қайта бошламаслиги кафолатланиши лозим.
