Испания аэропортида самолёт ёниб кетди
Ҳозирда ёнғин сабаблари аниқланмоқда.
Испаниянинг Майорка оролида жойлашган Пальма (Сон Сант Хоан) халқаро аэропортида Ryanair авиакомпаниясига тегишли самолётда ёнғин содир бўлди. Ҳодиса 6-июлга ўтар кечаси соат 00:30 атрофида учиш-қўниш йўлагида рўй берди. Бу ҳақда EFE агентлигига таянилиб point.md нашри хабар берди.
Фавқулодда сигнал қабул қилингач, аэропортга тўртта тез тиббий ёрдам бригадаси етиб борди. Расмий маълумотларга кўра, 18 нафар киши тан жароҳати олган, уларнинг аксарияти енгил даражада. Олти киши эса Пальма шаҳридаги касалхоналарга ётқизилган.
Ёнғиннинг сабаблари ҳозирча аниқланмаган. Мазкур ҳолат юзасидан тегишли идоралар суриштирув ишларини бошлаган.
Эслатиб ўтамиз, шу ҳафта бошида яна бир авиация ҳодисаси юз берган: LOT Airlines авиакомпаниясининг Софиядан Варшавага учаётган самолёти тормоз тизимидаги носозлик туфайли фавқулодда қўнишга мажбур бўлган эди.
