БАА Toncoin эгалари учун “олтин виза” дастурини ишга туширди
Павел Дуров криптоси эгалари БААда оилавий яшаш ҳуқуқига эга бўлмоқда.
Бирлашган Араб Амирликларида Toncoin криптовалюта эгалари учун янги имконият эълон қилинди. Павел Дуров томонидан асос солинган ушбу криптовалютани камида 100 минг доллар қийматида сотиб олган шахслар эндиликда 10 йиллик "олтин виза" олишлари мумкин. Бу ҳақда rbc.ru хабар берди.
Дастурга кўра, қўшимча тарзда 35 минг доллар миқдорида комиссия тўланади. Расмий маълумотларга кўра, ҳужжатлар топширилгандан сўнг виза 7 ҳафтадан кам муддатда берилиши мумкин.
Энг эътиборлиси — бу виза фақат Toncoin эгасининг ўзига эмас, балки унинг турмуш ўртоғи, фарзандлари ва ота-онасига ҳам БААда яшаш ҳуқуқини тақдим этади.
Мазкур янгилик эълон қилингач, Toncoin курси 12 фоизга ошди.
БААда “олтин виза” одатда капиталарининг камида 2 миллион дирҳам (тахминан 462 минг евро) бўлган инвесторлар ва тадбиркорлар, шунингдек, йиллик солиқ тўлови 250 минг дирҳамдан (тахминан 57 800 евро) ортиқ бўлганлар учун ажратилади.
