Мадагаскар яқинида 300 йиллик қароқчилар кемаси топилди

Мадагаскар қирғоқлари яқинида, 1721-йилда машҳур қароқчилар ҳужумига учраган Португалия кемаси қолдиқлари топилди. Бу ҳақда Live Science нашри хабар берди. “Носа Сенора ду Кабо” номли елканли кема Ҳиндистондан қимматбахо юк билан йўлга чиққан ва Оливье Левассер бошчилигидаги қароқчилар томонидан қўлга олинган.

 

Кема ҳозирда Нуси-Бураха ороли яқинидаги кичик бандаргоҳ тубида ётган. XVIII аср бошларида бу ҳудуд “қароқчиликнинг олтин асри” даврида машҳур қароқчилар макони бўлган. Кеманинг аниқлангани кўплаб далилларга асосланиб, археологик ва тарихий тадқиқотлар ёрдамида тасдиқланди.

 

Топилмалар орасида ёғоч ва фил суягида тайёрланган диний буюмлар, арабча ёзувли олтин тангалар ва чинни парчалари бор. Биби Марям тасвири, хоч ва Инжил матни битилган тақтачалар кеманинг диний мақомини кўрсатади. Бу буюмлар Гоада тайёрланиб, Португалия маркази – Лиссабонга жўнатилган бўлиши мумкин.

 

Тарихий манбаларга кўра, кемада Португалия витсе-қироли ва Гоа архиепископи бўлган. Бўрон сабаб кема шикастланган ва жангга тайёр эмас эди – шу боис 8-апрель куни қароқчилар томонидан осонгина эгалланган. Олимларнинг ҳисоблашича, кемадаги юкнинг бугунги кундаги баҳоси 138 миллион долларни ташкил этади. Витсе-қирол учун тўлов олингани маълум, аммо архиепископнинг тақдири ҳануз номаълумлигича қолмоқда.