Япония Филиппинга 6 та ҳарбий кема беради

Япония Жанубий Хитой денгизида кучлар мувозанатини сақлаб қолиш мақсадида Филиппинга ўз флотидаги 6 та эскирган, аммо хизматга яроқли ҳарбий кемани — эсминецларни топширишини расман эълон қилди. Бу қарор Хитойнинг минтақадаги ҳарбий фаоллиги ортиб бораётган бир пайтда қабул қилинди.

 

Япония Ташқи ишлар ва Мудофаа вазирликлари ушбу қадамни "минтақавий хавфсизликка ҳисса қўшувчи" ҳаракат деб атади. Эсминецлар Филиппинга босқичма-босқич топширилади ва маҳаллий ҳарбийлар уларни бошқариш бўйича тренинглардан ўтказилади. Кема топшириш Япониянинг "Тинчликпарвар хавфсизлик сиёсати" доирасида амалга оширилмоқда.

 

Филиппин ҳукумати Япониянинг бу ёрдамига миннатдорлик билдириб, уни Хитой босимига қарши мустаҳкам таянч деб атади. Манила ва Токио ўртасидаги ҳарбий ҳамкорлик кейинги йилларда кескин кучайиб бормоқда. Ҳар икки давлат АҚШ билан уч томонлама хавфсизлик альянси доирасида ҳаракат қилмоқда.

 

Хитой эса бу ҳаракатни минтақавий барқарорликка таҳдид деб баҳоламоқда. Пекин Япония ва Филиппиннинг бундай қадамларини "ташқи кучлар аралашуви" сифатида танқид қилиб, ўз манфаатларини ҳимоя қилишга тайёр эканини билдирган. Шу тариқа Жанубий Хитой денгизи яна глобал геосиёсий қарама-қаршилик марказига айланмоқда.