АҚШга яна бало ёғилдими: Трамп “аср фалокати”га Байденни айбламоқда

 

АҚШнинг Техас штатида рўй берган кучли сув тошқини оқибатида ҳалок бўлганлар сони 82 нафарга етди. Қурбонларнинг 68 нафари Керр округида аниқланган. Бедарак йўқолганлар сони эса ҳозирча 41 нафарни ташкил этмоқда.

 

Техас губернатори Грег Аббот маълумотига кўра, энг кўп талафот Керр округига тўғри келмоқда. Маҳаллий шериф Ларри Лейт берган баёнотга кўра, қурбонлар орасида 28 нафар бола бўлиши ҳодисанинг даҳшатли миқёсини яна бир бор тасдиқлайди. Расмийлар сув босган ҳудудларда излаш-қутқарув ишларини давом эттирмоқда.

 

Қидирув ишлари айниқса Гуадалупе дарёси яқинидаги “Camp Mystic” ёзги қизлар лагерига қаратилган. Тўфон вақтида лагерда 750 га яқин киши бўлган, уларнинг аксарияти эвакуация қилинган, бироқ 10 нафар қиз ва 1 нафар маслаҳатчи бедарак йўқолган ҳисобланмоқда. Қидирув ишлари 17 вертолёт, қидирув итлари ва юзлаб қутқарувчилар иштирокида олиб борилмоқда.

 

Доналд Трамп бу табиий офатни “аср фалокати” деб атаб, унинг оқибатлари учун Жо Байден маъмуриятини танқид остига олди. Трампнинг фикрига кўра, давлат тизими тошқин хавфи ҳақида олдиндан огоҳлантириш ва эвакуация ишларини самарали ташкил эта олмаган.

 

Шунингдек, Трамп аввалги йилларда об-ҳаво кузатуви ва табиий офатларга тайёргарлик билан шуғулланувчи федерал идораларда қисқартиришлар амалга оширганлиги учун танқидга учраганди. Бунга жавобан у шундай деди: “Бу бизнинг ташкилот эмас эди”, деб масъулиятни ҳозирги ҳукумат зиммасига юклади.

 

Мустақиллик кунига тўғри келган кучли ёмғирлар Керр округида ҳар квадрат метрга 300 литр ёғингарчилик олиб келди — бу минтақанинг бутун йиллик нормал ёғинининг учдан бирига тенг. Бу кўрсаткич сув тошқинининг кучли ва кутилмаганлигини яна бир бор тасдиқлайди.