Қозоғистонда яна куйдирги тарқалди, икки қишлоқ карантинга олинган
Касаллик юқтирганларнинг аҳволи ўртача оғирликда деб баҳоланмоқда, карантин 15 кун давом этади.
Қозоғистоннинг Оқмўла вилояти, Отбосар туманидаги икки қишлоқда қуйдирги касаллиги аниқлангани сабабли фавқулодда тартибда карантин жорий қилинди. Бу ҳақда мамлакат қишлоқ хўжалиги вазири Айдербек Сапаров ҳукумат брифингида маълум қилди.
Маълумотларга кўра, 2025 йил июн ойи охирида Отбосар туманида дастлаб 4 кишида қуйдирги аниқланган. Беморларнинг аҳволи ўрта оғир деб баҳоланган ва уларга барча зарур тиббий ёрдам кўрсатилмоқда. 8 июл ҳолатига келиб эса, 19 кишидан намуна олинган бўлиб, уларнинг 7 нафари расмий тасдиқланган қуйдирги ташувчилари сифатида қайд этилди, 1 нафар беморнинг аҳволи оғир деб баҳоланган. Қолганлар тиббий кузатув остида.
Қишлоқлар атрофида чорва ва одамларнинг кириб-чиқиши чекланган. Махсус тўсиқлар ўрнатилиб, эпизоотик бригадалар томонидан дезинфекция ва уларни зарарсизлантириш ишлари олиб борилмоқда. Карантин чоралари 1 июлдан кучга кирган. Карантин 15 кун давом этади. Шундан сўнг, синов учун янги намуна олинади. Агар қуйдирги борлиги тасдиқланмаса, карантин чоралари бекор қилинади.
Вазирлик матбуот хизмати аниқлик киритишича, дастлаб айтилган 19 та ҳолатдан 7 таси мусбат, 12 таси салбий натижа берган. Касалликдан ҳимояланиш учун аҳолига чорва маҳсулотларидан эҳтиёткорлик билан фойдаланиш, гўштни фақат ветеринария назоратидан ўтган жойлардан харид қилиш тавсия этилди.
Маълумот учун, қуйдирги — Bacillus anthracis бактерияси келтириб чиқарадиган оғир инфекцион касаллик бўлиб, одамларга асосан касалланган ҳайвон, унинг гўшти ёки чиқиндилари билан бевосита алоқа орқали юқади. Касаллик одамдан одамга юқмайди.
