Эрон расмийси Трампга суиқасд таҳдиди билан чиқди
Эрон ҳукумати “Қон шартномаси” номли платформа орқали Трамп ва Нетаняхуга нисбатан очиқ таҳдидлар қилди.
Эрон Олий раҳнамосининг маслаҳатчиси Жавод Ларижоний АҚШнинг президенти Дональд Трампга нисбатан очиқ таҳдид билан чиқди. Эрон давлат телевидениесида берган интервьюсида Ларижоний Трампга нисбатан дрон орқали суиқасд уюштириш имконияти ҳақида баёнот берди. Бу ҳақда Oxu.Az хабар берди.
Унинг айтишича, Трамп Флоридадаги Mar-a-Lago курортида дам олаётганида “кичик дрон” ёрдамида ҳужум уюштириш "жуда оддий" бўлиши мумкин. “Трамп қуёшда тўбланаётганида кичик дрон унинг қорнини тешиб қўйиши мумкин. Бу жуда оддий”, — дея таҳдидли фикр билдирди Ларижоний.
Мазкур баёнот “Қон шартномаси” деб номланган янги онлайн платформа ишга туширилган даврга тўғри келди. Платформа Эрон ҳукумати тарафидан “Худонинг душманлари” деб аталган шахсларни жазолашга даъват этади ва улар орасида айниқса Дональд Трамп ва Исроил Бош вазири Биньямин Нетаняху ажратиб кўрсатилган.
Сайт ушбу шахслар устидан “жазони амалга ошириш” учун мукофотлар таклиф қилмоқда. Ушбу платформанинг асосий мақсади Оятуллоҳ Али Хоманаийга қарши ҳаракат қилган деб ҳисобланган шахслар устидан “адолатни қарор топтириш” экани айтилмоқда.
Дональд Трамп эса ушбу таҳдидларни изоҳлар экан, Эрондан келаётган баёнотларнинг реал кучга эга эмаслигига ишора қилган, бироқ эҳтимолий хавфни инкор этмаган.
