АҚШ Мексика ва Европага нисбатан бож сиёсатида кескин чоралар кўрмоқда
Трампнинг айтишича, Мексика наркотик картелларга қарши суст ҳаракат қилмоқда, Европа эса АҚШ билан савдода номутаносибликка йўл қўяётгани учун божлар оширилмоқда.
АҚШ президенти Дональд Трамп 1 августдан бошлаб Европа Иттифоқи ва Мексикадан олиб кириладиган маҳсулотларга бож ставкалари 30 фоизгача оширилишини эълон қилди. У бу ҳақда Мексика президенти Клаудия Шейнбаум ва Еврокомиссия раҳбари Урсула фон дер Ляйенга йўллаган мактубларини ўзининг Truth Social тармоғида эълон қилди, деб ёзади washingtonpost.com.
Трампнинг таъкидлашича, Мексикадан импорт қилинадиган маҳсулотларга божларнинг оширилишига бу мамлакатнинг наркотик картелларга қарши етарли чора кўрмаётгани сабаб бўлган.
Европа маҳсулотларига нисбатан бож ставкаларининг оширилиши эса АҚШ ва Европа ўртасидаги савдо номутаносиблигига қарши чоралар доирасида амалга оширилаётгани билдирилган.
Трамп бу режани илк бор 2 апрел куни эълон қилган эди. Шундан сўнг, АҚШнинг асосий савдо ҳамкорларига Вашингтон билан музокаралар олиб бориш учун 90 кунлик муддат берилган. Фақат айрим давлатлар, жумладан, Буюк Британия бу муддат ичида АҚШ билан келишувга эриша олди.
Шунга қарамай, Трамп 1 августни кутмасдан, айрим мамлакатлардан импорт қилинадиган маҳсулотлар учун бож ставкаларини ошириш чораларини бошлаб юборган.
