Россия ёзнинг иккинчи ярмида Украинага йирик ҳужум уюштиришни режалаштирмоқда
Кремль Шимолий Кореядан олинган дрон ва ўқ-дориларни ҳужумда қўлламоқчи.
Германиянинг Bild нашри манбаларга таяниб ёзишича, Россия ёзнинг иккинчи ярмида Украинага қарши кенг кўламли ҳужумни амалга оширишни мўлжалламоқда.
Қайд этилишича, Кремль бу режа доирасида Шимолий Кореядан олинган дронлар ва ўқ-дорилар ҳамда бошқа жамланган ресурслардан фойдаланишни кўзламоқда.
Маълумотларга кўра, ҳужум Донецк ва Харьков йўналишларида фронтни ёриб ўтишга қаратилган. Россия томони стратегик авиация ва Shahed дронлари ёрдамида кенг кўламли зарбалар беришга алоҳида эътибор қаратмоқда. Бу ҳаракатлар Украина қуролли кучларини заифлаштириш ва эҳтимолий музокаралар олдидан уларни чарчатишга хизмат қилувчи стратегиянинг бир қисми сифатида баҳоланмоқда.
Нашр хабарларига кўра, Украина зудлик билан ҳаво мудофаа салоҳиятини кучайтириши ва иттифоқчиларнинг қўшимча ҳарбий ёрдамига муҳтож. Акс ҳолда, Россиянинг янги ҳужум тўлқинига қарши туриш қийинлашади.
