Испанияда салкам 1200 нафар одам иссиқдан вафот этди
Ҳалок бўлганларнинг асосий қисми қариялардан иборат.
Май-июль ойларида кузатилган ўта юқори ҳарорат Испанияда 1180 кишининг бевақт ўлимига сабаб бўлди. Бу ҳақида мамлакат соғлиқни сақлаш вазирлиги хабар берди.
Қайд этилишича, 16 майдан 13-июлгача иссиқлик тўлқинлари билан боғлиқ 1180 та ўлим қайд этилган. Ҳалок бўлганларнинг асосий қисми (95 фоиздан ортиғи) 65 ёшдан ошганлардир.
Ўтган йилнинг шу даврида Испанияда жазирама туфайли 70 киши ҳалок бўлганди. Бундан ташқари, июль ойининг биринчи ҳафтасида Испанияда иссиқлик билан боғлиқ ўлимлар сони июнь ойидаги умумий кўрсаткичга нисбатан 47 фоизга ошган.
Испаниянинг жазирама тўлқинларидан энг кўп зарар кўрган ҳудудлари мамлакатнинг шимолий қисмида жойлашган Галисия, Ла-Риоха, Астурия ва Кантабрия бўлди, уларда сўнгги йилларда анъанавий тарзда ёзги иссиқ ҳаво ҳарорати сезиларли даражада ошган.
