Исроил кучлари Дамашқда жойлашган Сурия Бош штаби ва Президент саройига кучли зарба берди
Ҳужум Сурия жанубидаги друз аҳолига қарши ҳаракатларга жавобан амалга оширилди.
Исроил Мудофаа кучлари (IDF) томонидан Сурия пойтахти Дамашқда жойлашган ҳарбий объектларга, жумладан, Сурия Қуролли Кучлари Бош штаби ва Президент саройи биносига зарба берилди. Бу ҳақда IDF ва хорижий ахборот агентликлари хабар бермоқда.
Исроил расмийларининг баёнотларига кўра, зарбалар Сурия жанубидаги Сувайда вилоятида друз жамоасига қарши ҳаракатлар ортидан амалга оширилган.
Исроил мудофаа вазири Исроел Катс бу ҳужумни “Дамашққа огоҳлантириш даври тугагани”га ишора деб атади. У ижтимоий тармоқдаги саҳифасида қуйидагича баёнот берган: “Энди оғриқли жавоб зарбалари бошланади. Ас-Сувайдо ҳудудида ҳарбий операциялар давом этади ва друзларга ҳужум қилган кучлар йўқ қилинади.”
IDF баёнотида зарба Дамашқдаги бош штаб биносининг кириш қисмига йўналтирилгани қайд этилган. Маълумотларга кўра, зарба натижасида бино жиддий зарар кўрган ёки бутунлай вайрон бўлган.
Исроил томони Сурия жанубидаги вазиятни, хусусан ҳукумат кучларининг друз аҳолига нисбатан ҳаракатларини диққат билан кузатиб бораётганини таъкидлади. Расмий баёнотга кўра, IDF сиёсий раҳбарият кўрсатмасига биноан аниқ нишонларга зарбалар беришда давом этмоқда.
Ҳозирча ҳужум оқибатида қурбонлар ёки жабрланганлар тўғрисида расмий маълумот берилмаган.
