Трамп маъмурияти 500 тонна болалар учун мўлжалланган озиқ-овқатни йўқ қилишга буйруқ берди
Афғонистон ва Покистондаги 1,5 миллион боланинг ҳафталик эҳтиёжи учун мўлжалланган маҳсулотлар бюрократик тўсиқлар туфайли бекор қилинди.
АҚШ президенти Доналд Трамп бошчилигидаги маъмурият USAID томонидан ажратилган 500 тонна юқори калорияли печеньени йўқ қилишга қарор қилди. The Atlantic нашрининг ёзишича, бу маҳсулотлар Афғонистон ва Покистондаги 1,5 миллион болани бир ҳафта давомида озиқлантириш учун мўлжалланган эди.
Ёрдам маҳсулотлари Дубайдаги омборда сақланаётган бўлиб, муддати тугаш арафасида қолиб кетган. Сабаби эса — USAID фаолиятининг Трамп маъмурияти томонидан қисқартирилиши ва ёрдамни тарқатишга рухсат берилмаганидир.
Ушбу озиқ-овқатлар табиий офатлар ва уруш зоналаридаги муҳтож болаларга етказилиши керак эди. Аммо бюрократик тўсиқлар ва сиёсий қарорлар туфайли маҳсулотлар етказилмай, йўқ қилиниши белгиланди. Ёқиб юбориш жараёнинг ўзи ҳам 130 минг доллар харажат талаб қилади.
Ушбу ҳолат глобал очлик муаммоси ортиб бораётган бир пайтда содир бўлгани кенг жамоатчилик томонидан танқидга сабаб бўлди. Мутахассислар бу қарорни инсонпарварлик тамойилларига зид деб баҳоламоқда.
