Европа Иттифоқи Исроилга қарши санкция жорий этмасликка қарор қилди
Брюсселда ташқи ишлар вазирлари йиғилиши якунида Исроилга нисбатан санкциялар ҳозирча киритилмаслиги, лекин вазият доимий назоратда бўлиши таъкидланган.
Европа Иттифоқи (ЕИ) Исроилга қарши санкция қўллаш масаласида ҳозирча ижобий қарорга келмади. Бу ҳақда ЕИ вакили Кажа Каллас Брюсселда бўлиб ўтган ташқи ишлар вазирлари йиғилишидан сўнг маълум қилди. Бу ҳақда The Conversation нашри хабар берган.
Унинг айтишича, Исроилнинг Ғазо секторига инсонпарварлик ёрдамини ошириш бўйича ЕИ билан келишувга кўра “баъзи ижобий белгилар” мавжуд. Шунга қарамай, Каллас аниқ ва кўпроқ амалий қадамлар кутилаётганини таъкидлади.
— “Исроилнинг ўз зиммасига олган мажбуриятларини қандай бажаришини диққат билан кузатиб борамиз. Ҳар икки ҳафтада бу жараён бўйича таҳлил ва баҳолаш бўлиб туради,” — деди Каллас.
Шунингдек, ЕИ санкциялар масаласини рад этмаган, аммо ҳозирча Исроилга қарши чораларни жорий қилиш режалаштирилмаган. Калласнинг қўшимча қилишича, агар Исроил ўз мажбуриятларини бажармаса, қўлланилиши мумкин бўлган бошқа чоралар рўйхати ҳам ишлаб чиқилган.
— “Бу вариантлар бизнинг кун тартибимизда қолади ва зарурат туғилганда ҳаракат қилишга тайёрмиз,” — деди ЕИ вакили.
