Исроил 600 минг фаластинлик учун ёпиқ “гуманитар шаҳар” барпо этишни режалаштирмоқда

Исроил расмийлари Ғазо секторида давом этаётган ҳарбий ҳаракатлар фонида янги ташаббусни илгари сурди: улар 600 мингга яқин фаластинликни жойлаштириш учун Рафаҳ яқинида “гуманитар шаҳар” барпо этиш режасини кўриб чиқмоқда. Бу ҳақда The National нашри музокараларга яқин манбаларга таянилиб хабар бермоқда.

 

Исроил мудофаа вазири Йоав Галантнинг топшириғи асосида тайёрланган мазкур режа доирасида Ғазо ва Исроил чегараси бўйлаб 2 километр чуқурликдаги хавфсизлик зонаси ҳам ташкил этилиши кўзда тутилган. Ушбу ҳудуд фаластинликларнинг ҳаракатланишини чекловчи, доимий назоратдаги зонага айланиши мумкин.

 

Аввалроқ, мудофаа вазири Исраэл Кац Рафаҳда жанговар ҳаракатлар натижасида вайрон бўлган ҳудудда махсус “гуманитар шаҳар” қуриш имкониятларини ўрганишни буюрган эди. Бу ерда, Исроил маълумотига кўра, ҲАМАС ҳаракатида бевосита иштирок этмаган фуқаролар вақтинча жойлаштирилиши мумкин.

 

Бироқ Бош вазир Биньямин Нетаньяху бу режа расмий ҳукумат позицияси эмаслигини, балки коалициядаги ўнг қанот партиялари ташаббуси сифатида кўрилаётганини билдирган. Унинг сўзларига кўра, бу борада ҳали ҳукумат даражасида расмий қарор мавжуд эмас.

 

Шунга қарамай, Тель-Авив Миср ва Қатар воситачилигида олиб борилаётган музокараларда ушбу режа устида иш олиб борилаётганини тасдиқлаган. Шунингдек, Ғазо секторидаги шимолий ҳудудлардан аҳолини жанубга – Хон-Юнис шаҳри яқинидаги тор қирғоқ зонасига кўчириш таклифи ҳам билдирилган.