Исроил Сурияга ҳужум қилди
Бу ҳақда Исроил Мудофаа Кучлари расман маълум қилган.
Исроил Мудофаа Кучлари (ИДФ) Дамашқдаги Сурия Мудофаа вазирлигининг кириш қисмига зарба берганини маълум қилди. Сурия Соғлиқни сақлаш вазирлиги камида 10 киши ҳалок бўлганини, 18 киши жароҳат олганини билдирди. Бу ҳужум Суриянинг жанубидаги Свеида шаҳрида бошланган этник тўқнашувлар фонида юз берди. Бу ҳақда ABC news хабар берган.
ИДФ баёнотида айтилишича, Исроил Сурия ҳарбийларининг Друзларга қарши ҳаракатларини яқиндан кузатмоқда ва ҳудуддаги зарур чораларни кўрмоқда. Шу муносабат билан Исроил Суриянинг танклари, ракета қурилмалари ва оғир қуролланган автомашиналарини ҳам нишонга олди. Ҳужумлар Суриянинг жанубида, Голан тепаликлари яқинида амалга оширилган.
Свеида воқеалари Сурия ичида этник зиддиятларни яна кучайтирди. Ассад режими қулаганидан кейин ҳокимиятга келган вақтинчалик президент Аҳмад ал-Шараа ҳукумати ва Друзлар ўртасида кескинлик юзага келган. Шу сабабли Исроил Суриянинг янги ҳукумати билан алоқаларни нормаллаштириш бўйича уринишлари ҳам мураккаблашиб қолди.
Исроил Бош вазири Нетаняҳу Исроилда яшовчи Друзлар гуруҳларини чегарани бузиб Сурия ҳудудига ўтмасликка чақирди. "Биз Друз биродарларимизни ҳимоя қилиш учун ҳаракат қиляпмиз. Аммо Исроил фуқаролари сифатида сизларнинг ҳаётингиз хавф остида," деди Нетаняҳу.
