Биз Суриянинг бўлинишига йўл қўймаймиз — Эрдоған
Туркия раҳбари Исроилнинг Сурияга ҳужумини қоралаб чиқди.
Туркия Суриянинг ҳудудий яхлитлигини ҳимоя қилиш сиёсатига амал қилишда давом этади ва унинг бўлинишига йўл қўймайди. Бу ҳақда мамлакат раҳбари Ражаб Тоййиб Эрдоған халққа қилган мурожаатида айтиб ўтди.
“Қўшнимиз Суриянинг ҳудудий яхлитлигини ҳимоя қилиш бизнинг асосий сиёсатимиздир. Биз Суриянинг бўлинишига розилик берганимиз йўқ ва бермаймиз ҳам”, — дея таъкидлаган Туркия етакчиси.
Эрдўғон ўз нутқида Исроилга нисбатан кескин фикрлар айтди ва уни “террорчи давлат” деб атади. Шунингдек, Тел-Авивни халқаро нормаларни бузганликда ва Сурия ҳудудига ноқонуний зарба беришда айблаган.
“Исроил қонун, ҳуқуқ ва тамойилларни тан олмайди”, — деган Эрдоған ўз мурожаатида.
Эслатиб ўтамиз, аввалроқ Исроил Бош вазири Бенямин Нетаняху Суриядаги Голан тепаликларидан Друзлар тоғларигача бўлган ҳудуд демилитаризация қилинишини маълум қилганди.
Бош вазирнинг айтишича, Исроил ўз манфаатларини ва Араб Республикасидаги друзлар аҳолиси хавфсизлигини ҳимоя қилишда давом этади.
