Иссиқ кунларда чекиш соғлиқ учун жиддий муаммоларга олиб келиши маълум қилинди
Чекишнинг зарари ёз фаслида янада хавфли тус олади.
Чекишнинг зарари ёз фаслида янада хавфли тус олади. Бунда нафақат никотиннинг ўзи, балки юқори ҳарорат ҳам юрак-қон томир тизимига қўшимча юк бўлиб, жиддий соғлиқ муаммоларига олиб келиши мумкин. Бу ҳақда "Известия" нашри маълум қилган.
Мутахассиснинг сўзларига кўра, иссиқ ҳавода чекиш қон томирларининг янада сиқилишига сабаб бўлади. Бу эса юрак уриш тезлигини ва қон босимини оширади, натижада гипертония, инсульт ва юрак хуружи хавфи кучаяди.
“Иссиқ ҳавода организм аллақачон стресс остида. Чекиш эса қоннинг қовушқоқлигини ошириб, тромбоцитлар даражасини кўтаради. Бу тромбоз (қон қуйилиши) хавфини кескин оширади, айниқса инсон етарли миқдорда сув ичмаса,” — дея огоҳлантирди амалиёт шифокори ва гастроэнтеролог Шота Каландия
Шифокорнинг қўшимча қилишича, чекиш организмда кислород етишмовчилигини ҳам кучайтиради. Бу ҳолат, айниқса, иссиқда организмнинг умумий ҳолатига салбий таъсир кўрсатади. Шу сабаб чарчоқ, асабийлашиш, диққатни жамлай олмаслик ва умумий ҳолсизлик каби ҳолатлар кузатилиши мумкин.
Шота Каландия шунингдек, чекиш тўқималарнинг кислород билан таъминланишини янада заифлаштиришини таъкидлаб, натижада қон айланиши бузилиши, моддалар алмашинуви секинлашиши ва иш қобилияти пасайишини қайд этган .
Шифокор фуқароларга иссиқ кунларда соғлиғига алоҳида эътибор беришни, айниқса ҳаво ҳарорати юқори бўлса, ҳеч бўлмаганда вақтинчалик чекишни тўхтатишни тавсия қилган .
