Трампга сурункали веноз етишмовчилиги ташхиси қўйилди
Оқ уй Трампнинг умумий соғлиғи ҳозирда яхши эканини маълум қилган.
АҚШ президенти Доналд Трампга яқинда ўтказилган тиббий кўрик давомида сурункали веноз етишмовчилиги ташхиси қўйилди. Бу ҳақда Оқ уй матбуот котиби Каролин Левитт брифингда маълум қилган.
“Текширув натижаларига кўра, сурункали веноз етишмовчилиги аниқланган. Бу 70 ёшдан ошган инсонларда кенг тарқалган ҳолат. Муҳим жиҳати шундаки, чуқур веналар тромбози ёки артериал касаллик аломатлари аниқланмади”, — деди Левитт.
Сўнгги ҳафталарда Доналд Трамп оёқларида шиш пайдо бўлишидан шикоят қилган. Бундан ташқари, унинг қўлларининг орқа томонида майда кўкаришлар ҳам кузатилган. Оқ уй матбуот котиби буни қуйидагича изоҳлади:
“Кўкаришлар тез-тез ва кучли қўл сиқишлар, шунингдек юрак-қон томир касалликларининг олдини олиш учун қабул қилинадиган аспирин билан боғлиқ.”
Оқ уй вакилининг таъкидлашича, Доналд Трампнинг умумий соғлиғи яхши, у ҳар куни ўнлаб одамлар билан учрашиб, фаол иш олиб бормоқда. Шунингдек, сурункали веноз етишмовчилиги тўғри назорат қилинса, жиддий асоратлар хавфи туғдирмаслиги айтиб ўтилди.
Маълумот учун, сурункали веноз етишмовчилиги бу— кекса ёшдаги инсонларда кўп учрайдиган қон айланиши муаммосидир. Ўз вақтида даволанса ва назорат қилинса, беморнинг кундалик ҳаёт фаолиятига тўсқинлик қилмайди.
